Тропарь, глас 2:
Священноисповедниче отче Георгие,/ во дни гонений безбожных на Церковь Русскую/ поношения, заточение, изгнание и горькия работы,/ Христа ради претерпел еси,/ и ничтоже разлучи тя от любве Божия./ Таже, благочестно в мире пожив,/ свидетельствовал еси Господа Иисуса Христа,/ Егоже моли спастися душам нашым.
Кондак, глас 2:
Яко звезда новая Церкве Русския явился еси,/ терпеливодушне Георгие священноисповедниче,/ Христа Бога прославляя/ и в нощи безбожия путь верным указуя./ Темже молим тя:/ моли нам, сродником твоим,/ в вере Православней утвердитися/ и спастися душам нашым.
Молитва
О, преславный и добропобедный священноисповедниче Христов Георгие, пастырю добрый, Церкве Русския украшение, земли нашея доброе прозябение, сродников твоих похвало и образе!
Ты, не убоявся мучителева прещения, веру православную небоязненно исповедал еси и, болезни и страдания с любовию ко Христу претерпев, вратами правды в Небесное Царство вшел еси. Темже молим тя, вознеси ныне теплую молитву твою ко Господу о Отечестве нашем, да утвердит его в вере Православней до скончания века, нас же, чтущих память твою, да укрепит спасительныя заповеди Его соблюдати, да, избавльшеся от греха и вечныя муки, вкупе с тобою сподобимся воспевати достопокланяемое имя Отца и Сына и Святаго Духа во веки веков. Аминь.
Величание:
Величаем тя,/ священноисповедниче Георгие,/ и чтим святую память твою,/ ты бо молиши за нас/ Христа, Бога нашего.
Читать житие священноисповедника Георгия Александровича Троицкого на сайте Воркутинской епархии.
(39)